பதிவு . 37

தறியுடன்... – இரா.பாரதிநாதன்.

உழைக்கும் மக்களுக்காக களத்தில் அமைதிவழியில் போராடினாலே, போராளிகள் அரச வன்முறைக்கு ஆளாகநேரிடும். இப்படியான சூழலில் மக்களுக்காக போராளிகள் ஆயுதங்களை தேர்ந்து எடுத்துவிட்டால், அரசால் அவர்கள் ஒடுக்கப்படுவதும், ஒழிக்கப்படுவதும் சர்வநிச்சயமாகும்.

இந்திய ஒன்றியத்தின் காவல் துறையால் அதிக ஒடுக்குதலுக்கும் இழப்புகளுக்கும் உள்ளானவர்கள் நக்சல்பாரி இயக்கத்தினர். அவர்கள் எப்படி மக்களை அரசியல் மயப்படுத்தினர், அதற்காக அரசு அவர்களை எப்படியெல்லாம் கொடுமைபடுத்தியதுஎன்பதைப்பற்றி சில தன்வரலாறுகள், பல நீதிமன்ற குறிப்புகள், உண்மையாகவும் உMண்மைக்கு புறம்பாகவும் நிறைய பத்திரிக்கை செய்திகள் உள்ளன. இதுப்பற்றிய இலக்கிய படைப்புகள் ஏதாவது இருக்கிறதா என்று பார்த்தால் ஏமாற்றமே. அந்த ஏமாற்றத்தை இல்லாமல் செய்யும் படைப்பே இரா.பாரதிநாதனின் தறியுடன் நாவல் என்றால் அதுமிகையாகாது.

சேலம் மாவட்டத்திற்குட்பட்ட பகுதியில் ( 1980 களில் ) வாழும் விசைத்தறி தொழிலாளர்களின் வாழ்க்கை பாடுகளையும், அவர்களுக்காக சங்கம் அமைத்து போராடிய போராளிகளின் பாடுகளையும் இந்த நாவல் மிகசிறப்பாக பதிவுசெய்துள்ளது. மேலும் போராட்டம் நடத்தியவர்களை தறி முதலாளிகளும் அரசாங்கமும் எப்படி ஒடுக்கியது என்பதையும் சொல்கிறது.

அரசியல் நாவல் என்றாலும் அரசியல் பிரச்சாரம் மேலோங்காமல் இருக்கிறது. தொழிலாளர்கள். போராளிகள், முதலாளிகள், காவல்துறையினர், சிறைத்துறையினர் என்று எல்லோரும் அவரவர் வர்க்கமாகவே இருப்பதை இருப்பதாகவே நேர்மையாக பதிவு செய்கிறது.

போராளிகளுக்கும் மக்களுக்குமான உறவு மிக இயல்பாகவே இருக்கிறது. இந்த நாவலில் வரும் ஆண்களும், பெண்களும், குழந்தைகளும் ரத்தமும் சதையுமாக நம்முள் பதிவாகின்றனர். அதனால் அவர்கள் மகிழ்ச்சியடையும்போது நாமும் மகிழ்ச்சியடைகிறோம், அவர்கள் துன்பப்படும்போது நாமும் துன்பப்படுகிறோம்.

அதிக பக்கங்கள் கொண்ட நாவல் என்றாலும் நாம் மிகவிரைவில் வாசித்துவிடுவோம். கதை அந்த அளவுக்கு விறுவிறுப்பாக செல்கிறது. நாவலாசிரியர் குறைந்த சொற்களில் மன உணர்வுகளையும், சமூக இயல்புகளையும். அதிலிருக்கும் அரசியல் உண்மைகளையும் முரண்களையும் மிகச்சிறப்பாக சொல்லி செல்கிறார்.

இந்நாவலை பொன்னுலம் பதிப்பகம் சிறப்பாக வெளியிட்டுள்ளது. இந்த நாவலின் முதல் பதிப்பு 2014 சனவரியில் வெளியாகியுள்ளது.

இந்த நாவல் வாசிப்பை சாத்தியமாக்கிய நண்பர் வேலூ சாரை நன்றியோடு நினைத்துக்கொள்கிறேன்.                                                                                                                                                                                                                                                                                                                                                                                                                        24.04.2020.

பதிவு . 36

குதுப்பி - ம.காமுத்துரை. 

திருமணங்கள், சீமந்தம், காதுகுத்து, அன்னதானங்கள், அரசியல் கட்சி கூட்டங்கள் என இன்னும் நிறைய நிகழ்வுக்களுக்கு செல்கிறோம், அங்கு சாப்பிடுகிறோம். அந்த உணவை தயாரித்த சமையல் கலைஞர்கள் மற்றும் அந்த தொழிலாளர்கள் பற்றி என்றாவது நாம் நினைத்துப்பார்த்ததுண்டா, அவர்கள் எப்படி வாழ்கிறார்கள், அவர்களின் வாழ்வுமுறைதான் என்ன என்று எண்ணிப்பார்க்கத்தான் நமக்கு நேரமிருக்கிறதா.... இந்த எல்லா கேள்விகளுக்கும் பதில் சொல்லும் விதமாக தமிழில் ஒரு நாவல் எழுதப்பட்டுள்ளது. பிரபஞ்சன் நினைவு பரிசுப்போட்டி(2019)-யில் பரிசு வாங்கிய நாவல்களில் ஒன்றான ம.காமுத்துரையின் குதுப்பி நாவல் அது.

தென் மாவட்டங்களில் ஒன்றான தேனியின் அல்லிநகரம் பகுதியை இந்நாவல் கதைக்களமாக கொண்டுள்ளது. அந்த பகுதியில் வீட்டு விசேசங்களுக்கு சமையல் வேலை செய்யும் தொழிலாளர்களை கதாப்பாத்திரங்களாகக்கொண்டு இந்நாவல் எழுதப்பட்டுள்ளது. அந்த எளிய மனிதர்களின் அசலான வாழ்வை எந்த மிகையுமில்லாமல் ரத்தமும் சதையுமாக ம.காமுத்துரை எழுதியுள்ளார்.

அந்த தொழிலாளர்களின் மகிழ்ச்சியை, துன்பத்தை, துரோகத்தை, துக்கிரித்தனத்தை, ஏக்கத்தையும், ஏமாற்றத்தையும்அருமையாக, எளிமையான மொழியில் நம் மனதில் ஆழமாக பதியும்படி சொல்லியுள்ளார்.

குதிப்பி நாவலை இரண்டு வார கால அவகாசத்தில் இன்றுதான் வாசித்து முடித்தேன். இந்த நாவலாசிரியரின் படைப்புகளை இதற்கு முன்பு வாசித்ததில்லை. இந்த நாவலாசிரியரின் பிற படைப்புகள் பற்றியும் நாவலாசிரியரின் வாழ்க்கை குறிப்பும் இந்த நாவலில் இல்லை. அது இருந்திருக்கலாம்.

இந்நாவலை Discovery Book Palace சிறப்பான முறையில் பதிப்பித்து வெளியிட்டுள்ளது.

வழக்கம்போல் இந்த நாவலை வாசிப்பை சாத்தியமாக்கிய நண்பர்Jega Deesan S-க்கு என் மனமார்ந்த நன்றிகள்.                                                                                                                                                                                                                                                                                                                                                                                                                          10.04.2020.

துளி . 291

அரசியல் பற்றிய பதிவை தனிப்பதிவாகவும்
தனிப்பட்ட வாழ்வு சார்ந்த பதிவை                                                                                    அரசியல் பதிவாகவும்                                                                                                புரிந்துகொண்டு குழம்புகிறான்
என்னை மிகச்சரியாக
புரிந்து கொண்டதாக 
சொன்ன நண்பன்...                                                                                                                                                                                                                                                                                                                                                                         9.4.2020.

பதிவு . 35

பிரபஞ்சனின் தேர்ந்தெடுத்த சிறுகதைகள் – தொகுப்பாசிரியர் பி.என்.எஸ்.பாண்டியன்.

எழுத்தாளர் பிரபஞ்சனின் முதலாமாண்டு நினைவேந்தலில் வெளிடப்பட்ட இந்த சிறுகதை தொகுப்பில் மொத்தம் 14 சிறுகதைகள் உள்ளன. மனிதர்களில் பலவகையானவர்கள் இருப்பதை போலவே அந்த மனிதர்களை படைப்பில் கொண்டுவரும் படைப்பாளிகளும் பலவகையினராக இருக்கின்றனர்.

பிரபஞ்சன் அன்பானவர்களின் வாழ்வை எழுதி சென்ற அசலான அன்பான மனிதர் மற்றும் படைப்பாளி. அவருடைய கதைகளில் வரும் மனிதர்கள் மிகவும் அன்பானவர்கள். மேன்மையான குணம் கொண்டவர்கள். பிரபஞ்சன் மிகவும் மென்மையான மொழியில் தன் கதைகளை நம் மனதில் எளிதில் பதியும்படி எழுதியுள்ளார் என்றால் அது மிகையாகாது.

ஒர் அறிவு உயிரான முருங்கை மரத்துக்கும் ஒரு குடும்பத்துக்குமான உறவை சொல்லும் பிரும்மம், அஃறிணையான வேட்டிக்கும் ஒரு குடும்பத்துக்குமான உறவை சொல்லும் அப்பாவின் வேஷ்டி, கற்பிப்பதற்காக தன் வாழ்க்கையை அற்பணித்த கமலா டீச்சர், கணவனின் இரண்டாவது மனைவிக்கு நல்லது செய்துவிட துடிக்கும் யாசுமின் அக்கா, தன்னை கொல்லவந்தவனை யாருக்கும் காட்டிக்கொடுக்க விரும்பாத மக்களை நேசிக்கும் அண்ணாச்சி.

ஐந்தறிவு உயிரான பசு மாட்டுக்கும் ஒரு குடும்பத்துக்குமான உறவை சொல்லும் மனுஷி, உலகுக்கே சமத்துவம் சொல்லிய பிரெஞ்சு அரசோடு சுயமரியாதைக்காக சட்ட போராட்டம் நடத்தும் வழக்கறிஞரின் கதையை சொல்லும் பாதுகை, வழிதவறிய மாணவியை நல்வழிபடுத்தும் ஆசிரியரின் கதையை சொல்லும் மரி என்கிற ஆட்டுக்குட்டி, மத ஆதிக்கத்திலிருந்துகொண்டு மனிதநேயத்தை காக்க முடியாது என வெளியேற்றம் செய்த மடாதிபதி.

குமாரசாமியின் பகல் பொழுது கதையில் சென்னை நகர வாழ்வின் அவலத்தையும், ஒரு மதிய பொழுதில் நெரூதாவின் வாழ்வை சொல்லும் திரைப்படம் பார்க்க சென்றுவந்த அனுபவத்தையும் சொல்கின்றன. நகரத்தில் தனிமையில் வாழ நேர்ந்த மருத்துவரின் துயரை சொல்லும் குழந்தை அழுதுக்கொண்டே இருக்கிறது கதை, இறந்தவரை புகைப்படம் எடுக்க சென்றுவந்த கதையான ஒரு நெகடிவ் அப்ரோச், பிளையார் கோவிலை விலைபேசும் கதையான ஓடாத பிள்ளையாரும் ஓடிய காவேரியும்.

பிரபஞ்சன் வாழ்ந்த புதுச்சேரி, தஞ்சாவூர் மற்றும் சென்னை ஆகிய நகரங்களே அவருடைய கதைளின் களமாக உள்ளன. சின்ன சின்ன வாக்கியங்களின் வாழ்வின் மகிழ்ச்சியான தருணங்களையும், அவலங்களையும் நம்முள் எளிதாக கடத்திவிடுகிறார்.

பிரபஞ்சனின் இறுதிகாலத்தில் அவருடனிருந்து அவரை கவனித்துக்கொண்ட படைப்பாளி பி.என்.எஸ்.பாண்டியன் இந்த தொகுதிக்கான கதைகளை தேர்வு செய்து தொகுத்துள்ளார். அவருக்கு என்னுடைய நன்றிகளும் பாராட்டுகளும்.

இந்த தொகுப்பிலுள்ள எல்லாகதைகளுமே அன்பானவர்களை உள்ளடக்கியதாகவே இருக்கிறது. மெல்லிய நகைச்சுவை எங்கும் நிறைந்திருக்கிறது.

இந்த தொகுப்பை 2019 ஆண்டில் முதல் பதிப்பாக, Discovery Book Palace சிறந்த முறையில் வெளியிட்டுள்ளது.

இந்நூலை வாசிக்கும் வாய்ப்பை உருவாக்கி தந்த நண்பர் Jega Deesan S -க்கு என்மனமார்ந்த நன்றிகள்.                                                                                                                                                                                                                                                                                                                                                                                                                                31.03.2020.

வரி . 16

மனிதன் பலவீனங்களால் சூழப்பட்டவன்.                                                                                                                                                                                                                                                                                                                        29.03.2020

பதிவு . 34

சல்வா ஜூடும் – சா. திருவாசகம்

நேற்று நீண்ட நாட்களுக்குப் பிறகு ஒரு சிறுகதை தொகுதியை மிகவும் விரைவாக வாசித்து முடித்தேன். அந்த சிறுகதை தொகுதியின் பெயர் சல்வா ஜூடும். நூலாசிரியரின் பெயர் சா.திருவாசகம். இவருடைய கதைகளை இப்போதுதான் முதன்முறையாக வாசிக்கிறேன். ஆனால் கதைகளை வாசிக்க வாசிக்க மனதுக்கு மிகவும் நெருக்கமாக உணரமுடிகிறது.

இந்த தொகுப்பில் மொத்தம் பதிமூன்று சிறுகதைகள் உள்ளன். அவற்றில் எட்டு கதைகள் தனியார் கல்லூரிகளை கதைக்களமாக கொண்டுள்ளது. குறைந்த சம்பளத்தில் வேலை நிரந்தரமற்று வேலைப்பார்க்கும் பேராசிரியர்களின் கனவுகள், ஏக்கங்கள், ஏமாற்றங்கள், பேராசிரியர்களுக்கும் மாணவர்களுக்குமான உறவு, பணி நிரந்தரத்திலிருக்கும் பேராசிரியர்களுக்கும் இவர்களுக்குமான உறவு, ஆண் பெண் நட்புகள், பெண் பேராசிரியர்களின் சங்கடங்கள் என பலவகையான வாழ்க்கை இந்த எட்டு கதைகளிலும் பதிவாகியுள்ளது. சமகால வாழ்வின் ஒருபகுதி மிகவும் நேர்மையாகவும் உணர்வுபூர்வமாகவும் இந்த கதைகளில் பதிவாகியுள்ளது.

அடுத்தப்படியாக மூன்று சிறுகதைகள் திரைப்படத்துறையை பின்புலமாக கொண்டுள்ளது. சொல்லுக்கும் செயலுக்கும்மான வேறுபாடுகளை கொண்டுள்ள மனிதர்கள் எல்லா துறைகளிலும் காணப்படுவார்கள்தான் என்றாலும் நிறங்கள் நிறைந்த திரைத்துறையில் நிறமாறும் மனிதர்களின் எண்ணிக்கை சற்றுக் கூடுதல்தான் போலும். மனிதன் மகத்தான சல்லிப்பயல் என்ற ஜீ.நாகராஜனின் மேற்கோளை நமக்கு அடிக்கடி நினைவுப்படுத்திக்கொண்டே இருப்பார்கள் போலும் இத்துறையில் மட்டும்.

இரண்டு சிறுகதைகள் மட்டும் வேறுவேறு கதைகளன்களை கொண்டவைகளாகும். இயற்க்கைக்கும் மனிதனுக்குமான உறவு, மனிதனுக்கும் மனிதனுக்குமான உறவு என்றும் விசித்திரமானதாகும். மழையை விரும்பும் மனிதர்களுக்கு அருகிலேயே மழையை வெறுப்பவர்களும், நேசத்தை வெறுப்பவர்களுக்கு மிக அருகிலேயே நேசத்தை விரும்புகிறவர்களும் இருக்கத்தானே செய்கிறார்கள்.

கதைகளில் காத்திரமான விசயங்களைப் பற்றி பேசியிருந்தாலும் கதைச்சொல்லும் முறையில் எல்லாக்கதைகளிலும் நகைச்சுவை மிளிர்கிறது. சிலக் கதைகளை தொடர்ந்து வாசிக்க முடியாது சிறிது இடைவேளை தேவைப்படும் அந்தளவுக்கு நம்மையறியாமல் வாய்விட்டு சிரிக்க வைத்துவிடுகிறார். அரசு, சாதி, மதம், பாலினம் மற்றும் வர்க்கம் சார்ந்து வெளிப்படும் வக்கிரங்களையும் வன்முறையையும் எளிய மொழியில் அதே சமயம் அதன் வலிகளை அதன் வீரியம் குறையாமல் நம்முள் கடத்திவிடுகிறார். . கதைச்சொல்லி சா.திருவாசகம் அவர்களுக்கு பாராட்டுகளும் நன்றிகளும்.

இந்த தொகுதியின் தலைப்பு கதையான சல்வா ஜூடும் அண்மையில் நான் வாசித்த சிறுகதைகளில் மிகவும் முதன்மையான சிறுகதையாகும். உலகின் மிகப்பெரிய சனநாயக குடியரசு என்றும், அகிம்சாமூர்த்தி காந்தியை தன் தேசதந்தை என்றும் கூறிக்கொள்ளும் இந்திய ஒன்றியத்தின் கோரமுகத்தை இந்த சிறுகதை சிறப்பாக பதிவு செய்துள்ளது. சமூக வலைதளங்களில் போராளியாக இருக்கும் மக்கள் களத்துக்கு ஏன் வரமுடியவில்லை. வந்தால் என்ன என்ன பிரச்சனைகளை எதிர்கொள்ள வேண்டும். ஒருவன் தன்னை போராளி என்று உணரும் தருணத்திலேயே அந்த எண்ணம் எப்படி காணாமல் போகிறது எல்லாவற்றுக்கும் சாட்சியாக இந்த சிறுகதை உள்ளது.

இந்த நூலை கருப்பு பதிப்பகம் வெளியிட்டுள்ளது. 2018 ஆண்டு இந்நூலின் முதல் பதிப்பு வெளியாகியுள்ளது.

இந்நூலை வாசிக்கும் வாய்ப்பை சாத்தியமாக்கிய நண்பர் செந்தில் வேலு அவர்களுக்கு என் மனமார்ந்த நன்றிகள்.                                                                                                                                                                                                                                                                                                                                                                                                     15.03.2020.

துளி . 290

தீராத் துயரங்களைத்                                                                                     தீக்கறையாக்கிவிடுகிறது                                                                                          தேவதையின் 
ஒற்றைப் பார்வை....                                                                                                                                                                                                                                                                                                                                    13.03.2020.